ავტორი: MangaMoon

ვაგაბონდი - მუსაში მიამოტო

გახსოვს... მუსაში ხმლის ნაცვლად თოხს რომ იღებს და აღმოაჩენს, რომ მიწის დამუშავება მისთვის ბრძოლაზე რთულია? იოშიოკასთან სისხლიანი დაპირისპირების შემდეგ მისი გზა ღარიბ სოფელში მიდის. იქ დაობლებულ იორისთან რჩება და უნაყოფო მიწაზე მოსავლის მოყვანას ცდილობს. თხრის, ქვებს აცლის, წყალი გამოჰყავს. მუშაობს იმავე სიჯიუტით, რომლითაც მოწინააღმდეგეებს ებრძოდა, მაგრამ მიწა მის ძალას არ ემორჩილება. წყალი ნიადაგში იკარგება. გაკეთებულ საქმეს წყალდიდობა ანადგურებს. შემდეგ კალიები ნათესებს აჩანაგებენ, ზამთარი ახლოვდება და სოფელში საკვები ილევა. თითოეული წარუმატებლობის უკან ახლა ადამიანების შიმშილი დგას — მათ შორის იორისაც, რომელიც მის გვერდით მუშაობს. მუსაში გამოცდილ გლეხს, შუსაკუს, აკვირდება. ხვდება, რამდენი რამ არ იცის: როგორ შეაკავოს წყალი, როგორ მოუაროს სუსტ ნერგს, როდის იმოქმედოს და როდის დაელოდოს. თანდათან სოფლის ხალხთან ერთად იწყებს მუშაობას. ბრინჯის ყანის მოწყობას ცოდნა, ბევრი ხელი და დრო სჭირდება. ბოლოს სადო ნაგაოკას წინ თავს ხრის და სოფლის გადასარჩენად საკვებს სთხოვს. საკუთარი სახელის დასამტკიცებლად ამდენი მებრძოლის დამმარცხებელი მუსაში ახლა სხვების სიცოცხლისთვის დახმარებას ითხოვს. როცა ყანაში მწვანე ნერგები ჩნდება, მათ წინ გადარჩენის შესაძლებლობა იზრდება. ამ მიწაზე მუსაში ძალის ახალ მნიშვნელობას სწავლობს: პასუხისმგებლობას ადამიანებზე, მოთმინებას და იმის აღიარებას, რომ ყველაფერს მარტო ვერ შეძლებს.

მასალა: ხე